Message:
Вёска Ліпец знаходзіцца за 24 км на паўднёвы ўсход ад Магілёва. Ліпец вядомы з 1633 года, калі ўзгадваецца як слабодка Ліпец Каралеўская ў Гарбавіцкай воласці, дзяржаўная ўласнасць. У 1635 г. абруб у Пуцькаўскім войтаўстве Магілёўскай эканоміі Аршанскага павета Віцебскага ваяводства Рэчы Паспалітай, дзяржаўная ўласнасць. У 1742 г. ў Асавецкім войтаўстве Магілёўскага староства-эканоміі, 20 жыхароў.
Пасля першага падзелу Рэчы Паспалітай у 1772 г. ў складзе Расійскай імперыі. У 1854 г. вёска належыць да казённага маёнтка Дуброва-Косцінскі Быхаўскага павета. У 1880 г. 44 двары, 286 жыхароў. Частка вяскоўцаў займалася адыходным промыслам. Паводле перапісу 1897 года ў Царкоўна-Асавецкай (Грудзінаўскай) воласці Быхаўскага павета Магілёўскай губерні, 57 двароў, 384 жыхары. Меліся хлебазапасны магазін, вінная крама. Ліпец адносіўся да прыходу Петра-Паўлаўскай царквы ў суседнім сяле Махава.
У 1909 г. - Ліпецкае сельскае таварыства, у вёсцы 60 двароў, 500 жыхароў. З 17. 7. 1924 г. ў Лупалаўскім раёне Магілёўскай акругі (да 26. 7. 1930), з 2. 3. 1931 года ў Магілёўскім раёне, з 20. 2. 1938 г. ў Магілёўскай вобласці. У 1926 г. 90 двароў, 557 жыхароў. Пачала дзейнічаць пачатковая школа. У 1931 г. арганізаваны калгас імя І. В. Сталіна. У Другую сусветную вайну з ліпеня 1941 г. да 27. 6. 1944 г. знаходзіцца пад акупацыяй. У вайну вёска была спалена. Пасля вайны Ліпец адбудаваны. У 1990 г. 117 гаспадарак, 226 жыхароў, у складзе саўгаса «Махава». У 2007 г. ў Махаўскім сельсавеце Магілёўскага раёна, 58 гаспадарак, 98 жыхароў.
Паводле:
Гарады і вёскі Беларусі
Магілёўская вобласць, кніга ІІ
Мінск, "Беларуская Энцыклапедыя імя Петруся Броўкі", 2009
Reply to the message
Back
