village Kublichi

2021-01-21 К. Шастоўскі

Кубліцкія цэрквы

Праваслаўная царква Кузьмы і Дзям'яна ў валасным цэнтры Кублічах зафіксаваная ужо ў 1593 г. За час існаваньня Кублічаў драўляны храм з такой назвай збудоўваўся пасьля спарахненьня старога неаднойчы. Апошні быў пэўна збудаваны на пачатку ХІХ ст. , бо праіснаваў да Другой Сусьветнай вайны. Стаяў ён у маёнтку на беразе возера Карасна. У 1837 годзе ўніяцкая царква Кузьмы і Дзям'яна, што належала да Бабыніцкага дэканату, мела 963 парафіяніна і атрымлівала гадавы прыбытак у памеры 80 рублёў срэбрам. Апрача таго ў недалёкіх Зярчэнічах стаяў ейны філіяльны храм. Напярэдадні ліквідацыі Ўніяцкае Царквы ў Кубліцкай парафіі служыў саракашасьцігадовы сьвятар Ян Ражынскі. Пэўна ў гэтай царкве быў ахрышчаны будучы пісьменьнік Васіль Быкаў.

У 1713 годзе апрача таго была збудаваная Петрапаўлаўская царква. Пэўна да сярэдзіны ХІХ ст. ейны стан значна пагоршыўся і пасьля канфіскацыі ў 1867 годзе касьцёла прыход перавялі ў каменны будынак былога касьцёлу. Згаданая ж царква Кузьмы і Дзям'яна стала прыпісанай да гэтага прыходу. "Słownik geograficzny Królestwa Polskiego. .. " згадвае пад 1889 год у Кублічах дзьве царквы каменную і драўляную, то бок былы касьцёл і царкву Кузьмы і Дзям'яна.

Міхась Баўтовіч