village Gaenskaya Yurzdyka

2013-03-16 Уладзімір Гваздзецкі

Пасяленне Юрысдыка з'явілася тады, калі на заходнім беразе ракі Айна, супраць пасялення Айна (Гайна), пабудавалі адзін з першых у ВКЛ касцёлаў. Некатарыя даследчыкі стараюцца даказаць, што касцёл быў пабудаваны вялікім князем Ягайлам, які ў 1386 годзе стаў каралём Польшы, але гэта не так. Праўда польскі даследчык Е. Ахманскі высветліў, што касцёл быў пабудаваны пазней, пры вялікім князе Вітаўце. У 1397 годзе касцёл не існаваў таму, што Вітаўт у гэтым годзе запісаў дзесяціну з Айны на карысць касцёла св. Станіслава, які знаходзіўся ў Вільні. Атрымліваецца, што ў 1398 годзе быў пабудаваны касцёл і вакол яго з'явілася пасяленне. Новае пасяленне атрымала назву ,,Юрысдыка,, , якая мела асобыя правы. Сама назва ,,Юрысдыка,, з латыні /Jurisdicus/ перакладаецца, як прававая альбо юрыдычная асоба, якая мела права пры выкананні ўскладзеных на яе функцый у час заключэння маёмасных і іншых здзелак, выступаць ад свайго імя, як самастойны суб'ект грамадзянскіх праў і абавязкаў. У тыя далёкія часы гэта быў вялікі крок наперад у будаўніцстве прававых адносін у ВКЛ.